|
|||||||||||
|
|
Жодзiнскi акорд "Літаратура і мастацтва". 17.10.2003 Вось ужо другі год запар пад свята будаўнікоў у Жодзіне ладзіцца рэспубліканскі конкурс маладых выканаўцаў эстраднай песні "Белазаўскі акорд". Сёлета яго правядзенне прымеркавалі да 55-годдзя вытворчага аб'яднання "БелАЗ". Па - добраму ўразіў і якасны склад спевакоў- канкурсантаў, і высокі агульны ўзровень правядзення гэтай імпрэзы, і яе прадстаўнічасць. Дастаткова сказаць, што ўрачыстую частку конкурсу адкрываў генеральны дырэктар ВА "БелАЗ" герой Беларусі Павел Марыеў, а ў журы былі запрошаны такія паважаныя майстры беларускага мастацтва, як спявак Анатоль Ярмоленка, кампазітар Леанід Захлеўны, паэт Уладзімір Карызна, а таксама такія папулярныя прадстаўнікі маладога пакалення артыстаў нашай эстрады, як Аляксандра Кірсанава і Сяргей Мінскі. А калі ўлічыць, што праграмы двух конкурсных дзён вялі тэлезоркі Ларыса Грыбалёва і Ягор Хрусталёў, дык можна толькі ўяўляць, як хваляваліся спевакі-пачаткоўцы ў асяроддзі вядомых асоб. Канкурсантаў аказаўся чортаў тузін. Менавіта 13 хлопцаў і дзяўчат з усіх рэгіёнаў Беларусі былі дапушчаны да спаборніцтва ў выніку папярэдняга праслухоўвання- прагляду дасланых у аргкамітэт "Белазаўскі акорда - 2003" аўдыа - і відэазапісаў. А ўвогуле на ўдзел у конкурсе паступілі 53 заяўкі. Тыя, хто ўрэшце трапіў у склад удзельнікаў, могуць цяпер пахваліцца, што прайшлі сапраўднае баявое хрышчэнне на прафесійнай сцэне. Бо ўмовы конкурсу былі даволі жорсткія, нягледзячы на добразычлівасць журы і публікі. Ацэньваліся рэпертуар, сцэнічны вобраз і, зразумела ж, вакальныя дадзеныя спевакоў. Дарэчы, годныя пеўчыя галасы (як кажуць, "вакальны матэрыял") былі літаральна ва ўсіх, хто выходзіў на сцэну Палаца культуры БелАЗ, каб паўдзельнічаць у спаборніцтве. Як кажуць, "спявалі ўсе". А вось свой інд ывідуальны стыль, тую самую "разынку", якая зўсёды вызначае талент, адшукалі пакуль што нямногія. Лідэрам паводле вынікаў двух тураў стала Наталля Нарко з Дзяржынска, якая атрымала першы прыз - вялікі тэлевізар "Гарызонт". Наталля вызначылася не толькі арганічнасцю сцэнічных паводзін і шырокім дыяпазонам багатага па тэмбры голасу, але і вельмі ўдалым выбарам песні ў 1-м туры. Драматычная "Балада пра Нямігу" Дзмітрыя Далгалёва на вершы Уладзіміра Пецюкевіча так дакладна адпавядала сцэнічнаму вобразу дзяўчынкі, яе спеўнай манеры, што патрабавальнае журы адразу ж вызначыла ў яе асобе бясспрэчную фаварытку конкурсу. Удала выступіла і выхаванка вакальнай студыі пад кіраўніцтвам вядомага беларускага кампазітара Алены Атрашкевіч мінчанка Дар'я Урызчанка, якая стала ўладальніцай 2-й прэміі (тэлевізар "Селена"). А 3-ю (малагабарытны тэлевізар "Гарызонт" ды музычны цэнтр) падзялілі Святлана Шкадровіч з Бабруйска і Дзмітрый Даніленка з Гомеля. Апошняму канкурсанту дастаўся яшчэ і прыз "За любоў да роднай песні". Спецпрыз журы "За сцэнічныю абаяльнасць" атрымала бабруйчанка Марына Гуменюк, а для Алены Вырвіч з Магілёва за яе незвычайны сцэнічны касцюм (гаржэтка з лісіцы ў выглядзе… топіка) вынаходлівы Анатоль Ярмоленка прыдумаў прыз "За пошук арыгінальнага вобраза". Ну, а Аляксей Лыскавец з Бярэзіны ды Віталь Жыгімонт з Жодзіна ганараваліся прызамі глядацкіх сімпатый. Зразумела, што за апошняга выканаўцу публіка хварэла асабліва эмацыянальна. І Віталь на падмануў чаканняў, скарыўшы сваіх землякоў-балельшчыкаў пяшчотным голасам і шчырасцю выканання. Сапраўдным падарункам яму была прапанова вядомага прадзюсера Сяргея Цітова, які таксама быў адным з ганаровых гасцей конкурсу, узяць удзел у канцэртным туры па Беларусі разам з Сяргеем Мінскім. Увогуле, ад конкурсу "Белазаўскі акорд-2003" і ва ўдзельнікаў, іў жодзінскай публікі, і ў членаў журы, і ў запрошаных асвятляць яго падзеі журналістаў - самыя добрыя ўражанні. Шчыра кажучы, я прапанавала б заснаваць яшчэ адзін спецпрыз - для яго арганізатараў,-пад назвай "За любоў да сваёй справы". І ўзнагародзіла б ім дырэктара Палаца культуры БелАЗ Генадзя Смольскага. Менавіта ён разам з дружнай і прафесійнай камандай сваіх аднадумцаў наладзіў у невялікім Жодзіне такую значную імпрэзу, якая сталася часткай агульнага свята горада і прадпрыемства -юбіляра ў прыватнасці. Сапраўды, таленавітымі бываюць не толькі артысты, але і арганізатары. І менавіта ад іх залежыць поспех той ці іншай справы. У гэтым сэнсе жодзінскаму конкурсу вельмі пашанцавала. Яго заснавалі людзі ініцыятыўныя,, творчыя і апантаныя, неабыякавыя да беларускай песні і беларускага слова. А таму, я упэўнена, роўна праз год чарговы "Белазаўскі акорд" павінен загучаць зноў - гэтак жа зладжана і значна. А яго пераможцы з цягам часу абавязкова стануць зоркамі нацыянальнай эстрады. Вольга Брылон |
||||||||||
| |||||||||||